Господи, просвети ум и сердце раба Твоего сего к познанию великих, безчисленных и неизследимых даров Твоих, ихже прият от неисчетных щедрот Твоих, во ослеплении бо страсти своея забы Тебе и дары Твои богатые, и нища себя быти вмени, богат сый благами Твоими, и сего ради зрит прелестне на благая рабов Твоих, имиже, о пренеизглаголанная Благостыня, ущедреши всех, коегождо противу силы его и по намерению воли Твоея. Отьими, всеблагий Владыко, покрывало диавола от очию сердца раба Твоего и даруй ему сердечное сокрушение и слезу покаяния и благодарения, да не возрадуется враг о нем, заживо уловленном от него в свою его волю и да не исторгнет его от руки Твоея.
